Nagaland: NSRLM leh BRAC thawkdunin mi harsa puihbawmna pe dawn

Nagaland State Rural Livelihoods Mission (NSRLM) chuan, global development organisation BRAC International an thawhpuinain, state-a SAY-SOBLOK programme hnuaiah chhungkaw khawsak harsa 4,000 puihbawmna an pe dawn.

NSRLM leh BRAC hian kum thum chhung thawh dunna tur inremna, Memorandum of Understanding (MoU) hi October 6 khan Kohima-ah an ziak a ni. Official-te chuan eizawnna kawnga puihna, sum lama ṭanpuina, thiamna tihhmasawn, sorkar scheme chhawr ṭangkai theihna leh market inzawmna ngelnghet hmangin chhungkaw khawsak harsaten eizawnna an neih chu ngaih pawimawh a nih thu an sawi.

Programme hi BRAC-in Graduation Approach a kalpui peng pakhat niin, eizawnna atana puihbawmna leh sum lama ṭanpuina chu thlunzawm a ni a, hemi hmang hian chhungkaw khawsak harsate dinhmun chawikan tum a ni. SAY-SOBLOK hi Samaveshi Aajeevika Yojana (SAY) hnuaia kalpui a ni a, Deendayal Antyodaya Yojana-National Rural Livelihoods Mission (DAY-NRLM) hnuaia mitin huap khawsak chawikanna programme a ni.

He hmalakna hnuaiah hian chhungkaw khawsak harsa thlan chhuahte chu an theihna, tualchhunga thil awmsa leh market-a remchang awmte a zirin eizawnna tura zirtirna pek an ni ang. Coaching mumal pek, financial literacy, savings assistance, sorkar scheme leh service hrang hrang awlsam zawka an dawn theihna tura ṭanpuina a huam dawn a ni. Rural development department commissioner leh secretary, Thavaseelan K chuan he programma hian chhungkaw khawsak zualte hnen a thleng dawn a, puihbawmna leh hmasawnna a kalpui dawn tih a sawi.