Sorkarin health facility a endik mek : Meghalaya Minister

Meghalaya sorkar chuan West Khasi Hills-a health facility panna hlat avanga kawng lakah nausen pakhat thihna thlen hnuah, hmun kilkhawr leh tlawhpawh harsatna hmuna healthcare facility dinhmun leh service pek chhuah dan a endik mek tih health minister Wailadmiki Shylla chuan a sawi.

Nausen hi health facility an panna turah darkar thum dawn lirthei tlan theihna hmun thleng turin a nuin kein a kalpui a ni. Kalkawnga hun an hman rei avangin nausen hi an chhan hman ta lo a ni. He thil thleng avang hian hmun hla leh tlawh pawh harsaa chengten a hun taka damdawi lam enkawlna an dawn theihna tura harsatna an tawh ṭhinte chuan sawizui a hlawh phah hle.

Shylla chuan sorkarin state pum, a bikin khaw hla tak taka chengten medical facility aṭanga enkawlna an dawn dan a zirchiang tih a sawi. Medical facility chungchanga zirchianna an neihah, service dawng tura hmun hla tak tak pan ngai loin hma an la dawn tih a sawi a, mahse hei hian hun a la duh deuh dawn a ni, a ti. Minister chuan health facility an thlenin nausen hi a thi hman tih sawiin, he thil thleng hi inkalpawhna ṭhat loh vang a nih thu a sawi bawk. State hmun eng emaw zatah inkalpawhna ṭha a awm loh avangin healthcare lamah harsatna an tawk tih a tarlang.

Minsiter chuan chuan nausen thih chungchangah hian Health Department hrilh hriat a ni lo a, nausen chhungte hian health official-te emaw tualchhunga Accredited Social Health Activist (ASHA) worker-te emaw hnen an thlen lo tih a sawi. Sorkar chuan kawng inkalpawhna ṭha siam turin hma a la mek tih sawiin, ambulance dah belh an tum tih a sawi.