Manipur: CoTU-in shutdown puang

Manipur-a Committee on Tribal Unity (CoTU) chuan October 3-a Kuki mi leh sa, kum 71-a upa Hemjang Haokip, a lo neihna hmun thlam aṭanga rukbo a nih hnua thia hmuh a nih avangin nimin, October 5 khan lungawi lohna lantirna atan Kangpokpi district pumah shutdown an puang. Haokip ruang hi khawtual mite leh security force-ten nasa taka an zawn hnuah Pathianni chawhnu lam khan hmuh a ni.

Ruang hi Kangpokpi district headquarters-ah Pathianni zan khan dah a ni a, Churachandpur-a mitthi dahna hmunah sawn leh a ni. Kuki-Zo community-te chuan na takin an dem tih an tarlang.

Shutdown puan vang hian sumdawnna hmun, mimal zirna in leh sikulte chu district pumah khar a ni a, sorkar office-te pawh a nghawng tel bawk. Hei bakah National Highway-2 a lirthei tlante pawh dan an ni a, lirthei ṭhenkhat service pawimawhte erawh dan an ni lo. Bongmol khuaah chuan shutdown volunteer, a tam zawk hmeichhiate chuan thupekin a huam chinah lirthei tlan an dang a ni. NH-2 a lirthei tlan eng emaw zat chu Bongmol-ah tihdin an ni a, highway-ah hian central security force-te chu venhimna kengkawh tura tirh an ni.