Arunachal: CM-in coffee chin tihpunna tur policy kalpui tum

Arunachal Pradesh chief minister Pema Khandu chuan, state chhunga coffee chin tihpunna tura inlungrual taka hmalakna kalpui a ṭul thu leh, value chain chak zawk hmanga coffee thar chhuah, quality ṭha leh loneitute sum lakluh tihpun chu a ngaih pawimawh ber thu a sawi. Coffee Board of India-in, Agriculture Department an thawhpuinaa Coffee Workshop buatsaih 'Hills to Cup' hawnna session-ah he thu hi a sawi a ni.

CM chuan Arunachal Pradesh-a coffee chin chu thil thar a nih loh thu leh, kum 50 dawn liam khan state-ah bulṭan a nih tawh thu a sawi. Mahse kum eng emaw zat chhung chu he sector hian ngaihven a hlawh loh bakah, awareness leh chawilarna mumal tak a dawng lo a ni, a ti. He sector chawikanna atan hian workshop buatsaih chu thil pawimawh tak a nih thu leh, he hunah hian coffee chingtu, entrepreneur, technical lama mithiamte leh stakeholder-te a hruai khawm tih a sawi bawk.

Chief Minister chuan workshop aṭanga rawtna leh ruahmanna awmte chu sorkarin a zirchiang dawn tih sawiin, coffee chingtute leh entrepreneur-te puihbawmna tura ruahmanna bik siamte ngaihtuah a ni dawn tih a sawi. Hemi atan hian Coffee Board-te chuan coffee chingtuten harsatna an tawhte zirchangin state sorkar hnenah rawtna an theh lut dawn tih a sawi. Ruahmanna an siam angin sorkar chuan thlawpna ṭha tak a pe chhunzawm dawn a ni, a ti.

Agriculture Department data tarlan danin, state-ah hian hectare 600 velah coffee chin a ni. Coffee chin zinga a tam zawk chu state hmarchhak biala Arunachal Pradesh Forest Corporation hnuaia awm a ni a, loneitu eng emaw zatin pilot leh model project hmangin coffee chin hna an thawk tawh bawk.