Manipur: Churachandpur IDP-ten Sangai Festival hmaa insawn chhuah an phut

Manipur-a Churachandpur-a tualchhung buaina avanga chenna in chhuahsan, internally displaced persons (IDPs) te chuan Sangai Festival hmaa insawn chhuah leh, Moreh ramria insumdawn tawnna kalpui tura rawtna chu a ngaih pawimawh sak turin sorkar an ngen. He an thil phut hi Meitei Society Churachandpur chuan press conference-ah sawilangin, an pawl hian IDP te a rang lama sawn chhuah an nih theihna turin Governor, Chief Minister leh state Home Minister-te hnenah memorandum an theh lut a ni.

An pawl chuan tlang leh phaia IDP-te chu President’s Rule hunlaia phase hrang hranga insawn chhuah tir tura tiam an nih thu leh, a thawh khatna chu kum 2025 December thlaa tihfel tura tih niin, a bak chu kum 2026 March 31-a insawn chhuak tura tih an nih thu an tarlang. Meitei Society Churanchandpur general secretary, Ningthoujam Ramesh Singh chuan IDP-te insawn chhuahna turah hian hmalakna a awm loh thu leh, relief camp-ah an la khawsak zui zel thu a sawi.

Singh chuan Kuki community-a civil society aiawh leh legislator-te chuan valley district hrang hrang an tlawh a, Chief Minister pawh an hmu tawh tih sawiin, phai leh hill district-a mipuite chu inkalpawh khap a nih thu a sawi. Community hrang hranga mipuite chu zalenna intluktlang tak neih an phut a, chung zingah chuan Moreh, Churachandpur, Kangpokpi leh National Highway-te pawh a tel.