Meghalaya: Mi 2 thattu damchhung lungin tang turin hrem

Meghalaya court chuan kum 2021-a West Khasi Hills-a hmeichhe kum 79 mi leh, kum 25 mi an awmpuinu thattu mi pakhat chu hrehawm taka damchhung lungin tang turin a hrem. West Khasi Hills, Nongstoin-a District and Sessions chuan he thubuai chungchanga evidence awmte a ngaihtuah hnuah September 30 khan thutlukna hi a siam ta a ni. Court chuan nunna a laksak pahnihah hian Rs nuai khat ve ve chawi turin a ti bawk.

He inthahna hi kum 2021 August thlaa thleng niin, nunna chan ta hmeichhe fapa hian Nongstoin khuaa an chenna in pawn lam aṭanga inkalh chu hmuin, chawhma dar 10:20 velah kawng kalhna chu tichhiain kum 79 mi a nu chu dish-washing room-ah thiin a hmu a ni. Hemi hnu lawkah kum 25 mi an awmpuinu chu bedroom-ah thia hmuh a ni ve leh a ni.

Nongstoin police-te chuan IPC Section 302 leh 34 hnuaiah thubuai ziak lutin, chhuizuina an nei zui nghal a ni. Pawikhawihtu nia puh hi Banphrangkupar Nongbri a ni a, chhuizuina neih a nih hnuah a lakah hian IPC Section 302 hnuaiah charge sheet theh luh a ni. Court chuan Nongbri hi mi pahnih thah thubuaiah thiam loh chantirin, damchhung lungin tang turin a hrem a, hei bakah a mi thah pahnihteah hian Rs nuai khat ve ve chawi turin a hrem bawk.