Meghalaya: Ruahtui 60% in tla tlem

Meghalaya-ah kumin June-September chhung khan ruahtui mm 1,077.1 chauh a tla a, kum dangah chuan a tlangpuiin mm 2,695.3 a tla ṭhin. Kuminah 60%-in ruahtui a tla tlem tih India Meteorological Department (IMD) chuan a tarlang.

Kumdang aia ruahtui a tlak tlem avang hian tui supply chungchangah nghawng lian tak a nei a, lui ṭhenkhatah tui a tlem avangin harsatna an tawk a ni. Public Health Engineering (PHE) Department senior official chuan, tui supply pek chhuah kawngah luite chu an innghahna ber a nih thu a sawi. Soil and Water Conservation Department pawhin tui chungchangah thuchhuah siamin, ruahtui a tlak tlem avangin state-in tui tlakchhamna a tawk thei tih a tarlang.

Ruahtui tlak dan data tarlanah, district 11 zinga pasarihah ruahtui a tla tlem hle bawk. Chungte chu East Garo Hills, East Jaintia Hills, North Garo Hills, South West Garo Hills, West Garo Hills, West Jaintia Hills leh West Khasi Hills-te an ni. East Khasi Hills, Ri Bhoi leh South Garo Hills-ah pawh ruahtui a tla tlem hle a, South West Khasi Hills-ah chauh ruahtui a pangngaiin a tla a ni.