Meghalaya: MCH staff nurse lakdan chhui chiang dawn

West Khasi Hills district administration chuan, September 30 khan Nongstoin-a MCH Hospital-a staff nurse lak danah thil felhlel a awm nia sawi chungchang chhuizui turin thupek a tichhuak. He thupek hi VPP State Youth Wing aṭanga thu an dawn bawhzuia tihchhuah a ni.

Deputy Commissioner office chuan thuneituten hna lak chungchangah hian langtlang, dikna leh a thiam leh tlingte chauh lak an ni dawn tih tarlangin, thil dik lo leh dan loa thil tih a awm chuan hmalak zel a ni dawn tih a tarlang. Chhuizuina nei tur hian member pahnih awmna inquiry committee din a ni a, West Khasi Hills police superintendent H Kharkongor leh, assistant commissioner leh executive magistrate E Lyngdoh-te an ni. Thuneitu chuan hna lak result leh final selection list chu chhui chianna neih zawh a nih hma chuan puan a ni dawn lo tih a tarlang.

September 29-a staff nurse lakna tura interview neihna hmunah Nongstoin MDC chu phalna nei loin interview hall-ah a lut nia sawi a ni. District administration chuan he thil thleng vang hian candidate-te leh interview board member-te chuan buaina an tawk niin an sawi. Hemi hnuah MDC hi Deputy Commissioner chamber-ah hruai a ni.

MCH Hospital, Nongstoin-ah hian contractual basis-in staff nurse hna lak a ni a, written exam chu September 21 khan Noingstoin College-ah neih niin, Deputy Commissioner office-a September 29 leh 30-a interview turin candidate 60 thlan chhuah an ni.