Nagaland: Governor-in ṭhalaite sorkar hna chauh ni lo ngaihven turin fuih

Nagaland governor Nand Kishore Yadav chuan, state chhunga ṭhalaite chu sorkar hna piah lamah, kutkawih eizawnna (entrepreneurship) leh eizawnna kawng dang dap thei tura thiamna tihmasawn turin a fuih. State khawpui Kohima-a Indira Gandhi Stadium-a State Level Youth Festival-a thu a sawiah, Yadav chuan sorkar hna chauh chuan ṭhalai thiamna nei sang tak takte duhthusam a thlenpui zo lo fo tih sawiin, ṭhalaite chu mahnia intungding thei tura thiamna neih lama insawrbing turin a chah.

Governor chuan ṭhalaite chu digital technology, entrepreneurship, loneih, tourism, handicraft, industry leh sector hrang hrangah hun remchang zawng chhuak turin a chah. Talent tipuitling tur chuan khawsak phung dik, inzir peihna leh teirei peihna neih a pawimawh thu a sawi. Hei bakah Youth Resources and Sports Department hmalaknain eizawnna tlaka mithiam chher chhuah tum a nih thu Yadav chuan a sawi bawk.

He hmalakna hnuaiah hian infiammi 80-te chu la phiar, floristry, pickle siam, chhang ur leh mobile siam training pek an ni. Yadav chuan State Sports Academy zirlaiten an thil siam chhuah an pholan chu fakin, infiammite chu infiamna lama an career bakah, thiamna dang tihmasawn zel turin a chah. Infiamna chuan nunphung a kaihruai a, thawh hona leh chhelnate a kengtel tih a sawi. Youth Resources and Sports department advisor, S Keoshu Yimkhiung chuan Nagaland ṭhalaite chuan thiamna, huaisenna leh chakna an nei tih a sawi. Ṭhalaite chu thiamna tipung a, an suangtuahnate a tak ram thlentir turin a fuih bawk a ni.