Sikkim: Regional India AI workshop-ah state aiawh palai tel

India AI, Ministry of Electronics and Information Technology kaihhruainaa West Bengal sorkar hnuaia IT Department-in a vawi khatna atana an buatsaih, AI workshop chu Kolkata-a New Town Convention Centre-ah neih a ni. He hunah hian Bihar, Jharkhand, Odisha, Sikkim leh West Bengal aiawhte an tel.

Sikkim palaite hi IT department principal director, T. Samdup chuan hoin, Skill Development deputy director Saimon Paul Rai leh assistant director Arun Tamang-te pawh an tel. West Bengal IT minister Dr Kalyan Chakraborti chuan state-level-a thawh hona tihchak a pawimawh thu a sawi. State hrang hrangte chuan dataset siam leh, AI hmanga mipui rawngbawlna kawnga harsatna sutkianna atan chanvo pawimawh tak an neih thu a sawi bawk.

Hei bakah AI hmanga talent tihhmasawn, thiamna leh thawh hona ṭha neih chu a ngaih pawimawh thu a sawi. Sikkim IT department principal director, T. Samdup chuan an state-in dataset, AI resource, data sharing leh digital tihhmasawnna tura thawh hona ṭha nei turin an inpeih tih a tarlang. Sikkim chu dataset, AI resource leh data sharing chungchang sawi honaah an lo tel fo tawh a, regional platform chuan state hrang hrangte inpuihtawnna leh, tualchhung mamawh ang zela AI solution siam turin a pui thei a ni, a ti.

Workshop-ah hian AI Centers of Excellence, startup ecosystem, academia-industry partnership, skilling leh State level-a capacity building chungchangte sawi ho a ni bawk. IIT Kharagpur, NIELIT Kolkata, Jadavpur University, TCS Research, NASSCOM leh Indian Statistical Institute aṭangin palai an tel bawk.