Kum 2023-a buaina a chhuah aṭangin khualzin an tlahniam: Manipur CM

Manipur chief minister Yumnam Khemchand Singh chuan September 27 khan kum 2023 May thla aṭanga tualchhung buaina a chhuah aṭangin state tlawhtu khualzin nasa taka an tlakhniam thu leh, hei hian tourism sector-ah a ṭha lo lam zawngin nghawng lian tak a nei tih a sawi.

Bishnupur district-a World Tourism programme-a thu a sawiah, CM Singh chuan tualchhunga buaina a chhuah hmain an state-ah kumtin khualzin nuai 1.75 vel an awm ṭhin tih a sawi a ni. State ṭhenawm Mizoram chuan kum khatah khualzin nuai 8 chuang an neih thu leh, sum lak luh kawngah hma an sawn tih a sawi. Hetih rual hian Manipur-ah erawh tualchhung buaina a chhuah chhunzawm zel avangin nasa takin khualzin state tlawh an tlahniam a ni, a ti.

Singh chuan Sikkim pawhin kum khatah state tlawhtu nuai 17 an nei tling tawh tih sawilangin, dan leh thupek dinhmun ngelnghet tak an neih vang a ni, a ti. An state chhungah dan leh thupek dinhmun a ṭhat loh avangin tourism sector pawh nasa takin a nghawng tawh tih a sawi a ni. Ram pawn aṭanga khualzin thleng thei turin, tourism infrastructure leh facility-te thuam chak a pawimawh thu a sawi.

Governor Ajay Kumar Bhalla pawhin he programme-ah hian thu sawiin, Manipur-a tourism sector chakna chu ramngaw leh monument mai piah lamah, mipui leh khawtlang nunah a innghat tih a sawi. Bhalla chuan homestay chawilar pawimawhnate sawilangin, tualchhung mite chu khualzinte thlen theihna tura an chenna in homestay-a thlak danglam turin a chah bawk a ni.