Sikkim: Sorkarin Rimbi-a leimin tuarte chhawmdawlna tur puang

Sikkim sorkar chuan Gyalshing district-a Rimbi khuaa leimin vanga harsatna tawk chhungkuate a rang lama sum lama puihbawmna pek an nih tur thu leh, leimimin chenna in a tihchhiatte siamṭhat a nih tur thu a puang. Gyalshing-a district collector Tenzing D. Denzongpa chuan official-te nen chhiatna thlenna khua hi tlawhin, chief minister Prem Singh Tamang-a'n thuneitute chu chenna in chhuahsante hriat chhuah a, an awmna tur nghet siamsak tura a tih thu a sawi.

Leiminin chenna in a tihchhiat 40-te chu Rs nuai 1.3 ṭheuh pek an ni dawn tih, Thawhṭanni khan official pakhat chuan a sawi. Chief Minister chuan leimin thlenna hmun hi a tlawh thuai dawn a, chhiatna tawk chhungkuate awmna tur ruahman turin official-te a hriattir bawk. Chhiatna tawkte inbengbelna tur ram tihfel a nih hunah chenna in sak a ni dawn a ni. Sorkar chuan Sikkim Garib Awas Yojana hnuaiah chenna inte sak a ni dawn tih official chuan a sawi bawk.

District administration chuan harsatna tawk list siamin, ni eng emaw zat liam ta khan department hrang hranga minister leh official-ten tlawhin, chhiatna thlen dan an zirchiang a ni. Rimbi hi Yuksom subdivision hnuaia awm, Gangtok aṭanga km 120-a hlaa awm a ni. August 13-a leimin thlen vang leh, kar eng emaw zat liam taa ruah nasa tak a sur avangin dinhmun hlauhthawnawmah an awm zui a, thuneitute chuan hmun hlauhawma awmte an lo sawn chhuak tawh bawk a ni.