Manipur: Kamjong-a Indo-Myanmar ramri bulah Naga civil mi 4 kaphlum

Manipur-a Kamjong district-a Myanmar ramri hnaih, Pilong khaw bulah September 24 khan Naga civil mi pali chu helpawl nia rinhlelhten an kaphlum tih tualchhung mipuiten an sawi. Thuneituten helpawl nia rinhlelh mi pali kahhlum an ni tih thu an dawn hnuah, Ningani khan helai hmunah hian police team an tir a ni. Mahse, police-te chuan tlai lam thleng khan he inthahna hi an la finfiah lo tih officer pakhat chuan a sawi.

Pilong khuaa cheng mipuite chuan international ramri pawn aṭangin helai hmunah hian helpawl chu lutin, mi panga an bei a, an zinga pali an thi niin an sawi. Beih tawk zinga pakhat chu tlanchhe hmanin, khaw mipuite leh tualchhung thuneitute hnenah thil thleng chungchang hi a hriattir a ni.

Pilong khua hi Kamjong district headquarters aṭanga km 34 vela hlaa awm a ni a, Myanmar nena international ramri an inṭawm a ni. He thil thlenna hmun nia report hi ramri pillar 91 leh 93 inkarah a ni. Tualchhung mite chuan mi palite hi Kuki National Army-Burma (KNA-B) cadre-te leh ralthuam keng Kuki helpawlin an kaphlum niin an sawi. Nunna chante hi Kangpat Khullen khuaa cheng Phami Jajo, Betterson Jajo leh Vareishim Jajo bakah, Zingsui khuaa cheng Ningthem Kashak-te an ni. He thil thleng hian ramriah buaina tichhuakin, Tangkhul Naga Long (TNL) chuan he inthahna thleng duh loh lantirna atan an thuneihna huam chhungah total shutdown an puang.