Assam : Cancer facility-ah kum 4 chhungin damlo nuai 15 vel enkawl: CM Himanta

Assam chief minister Himanta Biswa Sarma chuan, Assam Cancer Care Foundation (ACCF) din a nih aṭangin state chhunga network facility 12-ah damlo nuai 15 vel tan service pek chhuah a ni tawh tih a sawi. Service hrang hrang zingah consultation, diagnostic test, chemotherapy, radiotherapy leh cancer surgery-te a tel a, state chhunga treatment facility huang zauh a nih dan tarlan a ni bawk.

CM Sarma chuan Ningani zana ACCF board meeting leh, annual general meeting a kaihruainaah he thu hi sawiin, state chhunga cancer enkawlna leh a kaihhnawih healthcare service thuam chakna tura hmalakna kalpui mekte a thlirlet bawk. Kum li liam ta chhunga service pek chhuah zat chu meeting-ah an sawi ho bawk a ni. Damlote chu hmun danga inenkawl tura kal ngai tawh loin, state chhungah cancer enkawlna an dawng thei ta a ni, a ti.

Assam sorkar hian damdawi-in panga dah belhin cancer enkawlna network huang zauh a tum mek a ni. CM chuan official-te chu Dhubri, Nalbari, Nagaon, Sivasagar leh Goalpara-a damdawi-in sak tumte chu chak zawka kalpui turin a hriattir. ACCF hi Assam sorkar leh Tata Trust thawhdunna niin, state puma cancer enkawlna network siam a, inenkawlna awlsam zawk leh man tlawm zawka kalpuina tura din a ni.