Assam: Saraighat bridge project pahnihna hmangin inkalpawhna tihchangtlun tum

Assam-a Saraighat Rail-cum-Raod project pahnihna bakah, Agthori leh Kamakhya station inkara rel kawng siam hna chu thawh ṭan a ni thuai dawn a, piling work chu kumin October thla aṭanga thawh ṭan beisei a ni. Project hian Brahmaputra huam chhunga rel leh motor kawng a tizau dawn a, Guwahati hmar leh chhak lam inkalpawhna tihchak tum a ni bawk.

Northeast Frontier Railway (NFR) chuan, km 7.20 a thui Agthori-Kamakhya railway-doubling project thawhna tur chu kum 2024 khan Ministry of Railways-in a sanction tih an sawi. He project hi Larsen & Toubro (L&T) chuan a thawk dawn a ni. NFR chief public relations officer Kapinjal Kishore Sharma chuan geotechnical investigation zawh fel a ni tawh a, engineering design leh construction drawing pawh kalpui mek a ni tih a sawi.

Project-ah hian Brahmaputra dunga km 1.3-a thui double-decker rail-cum-road bridge siam pawh a tel. Lower deck-ah rel kawng pahnih a awm dawn a, upper deck-ah three-lane road bakah footpath a awm dawn bawk. Saraighat bridge, kum 1962-a dawh hian railway line pakhat leh two-lane road a nei a ni. Lei thar hi foundation ṭha taka dawh a ni dawn a, Open Web Girder superstructure a awm dawn bakah, main bridge chu metre 125-a thui a ni ang.

NFR chuan project thawhna tur ram lei leh utility awmsa sawn chhuah ngai chuan harsatna a thlen thu a sawi. Buaina tam zawk chu Assam sorkar leh tualchhung administration-te puihnaa chinfel a ni a, state agency-te nen inremna siamin buaipui ngai la awmte chinfel chhunzawm zel a ni.