Manipur: Cabinet-in khum 70 awmna dialysis centre din pawm

Manipur chief minister Yumnam Khemchand Singh kaihhruai state cabinet chuan, Nilaini khan thutlukna pawimawh pahnih siamin, dialysis facility tihzauh leh power transmission project-in a nghawng ram neitute hnena compensation siamṭhat an pawm. Sorkar thupuangtu Dr Sapam Ranjan chuan cabinet-in Imphal East-a State TB Hospital, Keirao-a khum 70 awmna tur Manipur State Dialysis Centre din a pawm tih a sawi.

He facility hi Jawaharlal Nehru Institute of Medical Sciences (JNIMS) hnuaiah kalpui a ni dawn a, dialysis infrastructure indaih lohna leh damloten hunrei tak an nghah a ngaih ṭhinna a titlem thei dawn a ni. Centre dinna tur hmun pawh endik a ni tawh bawk. Dialysis centre hi Pradhan Mantri Jan Arogya Yojana (PMJAY) nen thlunzawm a ni dawn a, Chief Minister-gi Hakshelgi Tengbang (CMHT) scheme hnuaia hamṭhatna dawngtute chuan a thlawnin inenkawlna an dawng thei dawn bawk.

Cabinet chuan India sorkarin Right of Way (RoW) kaihhruaina hnuaia power transmission line siamin a nghawng ram neitute tana compensation framework siamṭhat an pawm bawk. World Bank, Asian Development Bank leh railway project hnuaia state pawn lam emaw deposit-funded project thawhna hmuna emawa ram neitute chuan tower base-a an ram hlutna 200% hu leh transmission corridor 30% hu compensation an dawng ang. State sum hmanga project thawhah ram hlutna 100% hu compensation an dawng bawk dawn a, corridor area-ah 30% hu an dawng bawk ang.