Meghalaya: CM-in Maternity and child hospital hawng

Meghalaya chief minister Conrad K. Sangma chuan, Tura-ah khum 150 awmna District Maternity & Child Hospital (DMCH) a hawng. Hawnna hun hi 'A Solemn Celebration of Maternal & Child Health' tih thupui hmanga neih a ni a; healthcare infrastructure thuam chak, nu nau nei leh naute hriselna tihhmasawn bakah nu leh nau piang thihna thleng ṭhin venna tur a ni bawk.

He healthcare huang zauhnaah hian MOTHER (Measurable Outcomes in Transforming Health Sector through a Holistic Approach with a Focus on Women Empowerment) programme, Rescue Mission leh Chief Minister’s Safe Motherhood Scheme bakah nu naupai dinhmun ṭha loa awmte ngaih pawimawh niin, nu leh naute ei leh in turah referral system kalpui a ni.

Hawnna inkhawma thu a sawiah, CM Sangma chuan healthcare huang zauhna chuan infrastructure mamawhna sang zel a phuhru dawn a, sorkarin nu leh nau piang hriselna a ngaih pawimawhzia tilangtu a ni, a ti. Healthcare system chuan nu leh nau piangte hriselna a ngai pawimawh dawn tih sawiin, nau piang nunna chan an awm a duh loh thu a sawi bawk. Civil hospital, district hospital leh mother and child hospital-te chu tihzauh belh zel a nih theihna turin sorkarin hma a la mek tih a sawi bawk.

PM-DevINE hnuaiah state chuan, kum nga chhungin project kalpuina tur fund Rs vbc 750-800 vel an neih a beisei thu a sawi a, heng project tam zawk hi hriselna lam tihhmasawnna tur a nih thu CM chuan a sawi. Hospital infrastructure investment atana hmun ruat zingah Tura, Shillong leh Jowai-te pawh an tel.