Manipur: CCPUR Half Marathon-ah mi 4,000 tel

Manipur-a Churachandpur-a Central Reserve Police Force (CRPF) 58 Battalion leh, Sports Authority of India (SAI) ṭangkawpin an buatsaih, CCPUR Half Marathon-ah mi 4,000 vel an tel a, ṭhalaite zingah remna leh muanna, hriselna leh ruihhlo tel loa nunphung tihhmasawn ngaih pawimawh a ni.

He event hi infiamna lama tuimite tihphurna, hriselna leh khawtlang mipui tam zawk an tel theihna tura buatsaih a ni a, hemi rual hian ṭhalaite chu infiamna lama an tui theihna tura hun remchang siamsakna a ni bawk. Churachandpur district commissioner Krishna Kumar chuan CRPF-te hmalaknaah lawmthu sawiin, ṭhalaite chu remna leh muanna chhawmnung tur leh, ruihhlo laka inthiarfihlim turin a chah. 58 Battalion CRPF commandant Suraj Phogat cgyab marathon chu remna leh muanna a awm theihna tur leh, ṭhalaite chu infiamna lama an tui theihna tura buatsaih a nih thu a sawi.

Infiamna lama tuina chuan ṭhalaite chu hriselna leh, nunphung an hloh lohna turin a pui thei tih a sawi bawk. Phogat chuan hma huna marathon buatsaih turah mi 10,000 chuang an tel chhoh zel a beisei thu a sawi a ni. Hei bakah CRPF chuan helai huam chhungah hian infiamna hrang hrang buatsaih an tum tih Phogat chuan sawiin, chung zingah chuan football leh volleyball pawh a tel.