Manipur: CM-in Naga kum 17 mi thahna na takin dem

Manipur chief minister Yumnam Khemchand Singh chuan, September 21-a Tamenglong district-a Naga mi kum 17 mi thah a ni chu na taka a dem thu leh, he thil thleng hi zirlai pawisawi lo laka tharum thawhna a nih thu a sawi. He tleirawl nunna chan hi NK Wiphenbou a ni a, zing dar 10:30 vel khan Upper Nkou aṭanga Tamei khaw lam pana amaha a kal chu helpawl nia rinhlelhten an kaphlum tih police-te chuan an sawi.

Wiphenbou ruang hi Naga village volunteer-te chuan Upper Takou leh, Tamah (Malek) inkar kawngah an hmu a ni. CM Khemchand chuan thuchhuah a siamah, hetianga pawikhawihna hian khawtlangah hmun a chang lo tih sawiin, mitthi chhungte a tawrhpuina chu a social media Facebook-ah a tarlang. Zirlai pawisawi lo chunga tharum thawhna a thleng chu pawi a tih thu leh, state-a buaina a chhuah mek laia pawisawi loten an tuar ṭhin chu pawi a tih thu a sawi a ni.

He inthahna hi state chief minister hlui, N Biren Singh pawhin na taka demin, thuneitute chu rang taka hma la tur leh, tihkhawtlai awm loa pawikhawihtuten hremna an hmuh ngei a ṭul thu a social media-ah a tarlang bawk. Naga People's Front legislator leh Naga hruaitu hlun, Awangbou Newmai chuan he inthahna hi mi dawihzepte thil tih a nih thu leh, civil mite laka pawikhawihna nasa tak a nih thu a sawi. Newmai chuan Wiphenbou hi an chhungkaw mamawh lamin Tamei-ah a kal tih sawiin, kalkawngah kahhlum a ni, a ti.