Tripura: CM-in cricket academy din a ni dawn tih puang

Tripura chief minister Manik Saha chuan state sorkarin state chhunga cricket academy dinna tur ram acre 30 chuang a pek tur thu a puang a, he facility hi Tripura bakah hmarchhak bial leh ramchhung hmun danga player-ten an chhawr ṭangkai thei dawn a ni.

Tripura Cricket Association's annual awards ceremony-a thu a sawiah, Saha chuan academy din tur hian cricket infrastructute a thuam chak dawn bakah, player-te tan facility ṭha zawk a pe dawn tih a sawi. Tripura Cricket Association (TCA) president ni bawk Saha chuan, cricket hmasawnna tur chuan infrastructure, coaching leh support service-ah investment neih a pawimawh thu a sawi.

Player-te hmasawnna thuam chak turin sports infrastructure ṭha leh, coaching facility changtlung bakah staff leh physiotherapist-te mamawh a nih thu a sawi. Infrastructure thuam ṭhat aṭanga bul ṭanin, naupangte chuan infiamna hmun ṭha tak an nei tur a ni a, coaching ṭha zawk pek an nih dawn bakah, coach ṭha, supporting staff leh, physiotherapist-te pawh an ṭha tur a ni, a ti. Heng zawng zawng hi cricket tihhmasawnna atana pawimawh a nih thu Chief Minister chuan a sawi bawk. CM Saha chuan cricket academy din turah hian, sorkar chuan ram acre 30 aia zau pe turin thutlukna a siam tawh thu a sawi bawk.