Guwahati-Mankachar night bus-ten beih tawk

Guwahati aṭanga Mankachar lam pan night super bus eng emaw zat chu September 21, Pathianni zing dar 2 vel khan Meghalaya-a Tikrikilla huam chhungah misual tu tih hriat lohten an bei a, driver ṭhenkhatin hliam an tuar bakah, bus tam tak windshield tihchhiat a ni bawk.

Report tarlan danin night bus-te hian Tikrikilla an paltlang laiin misual tu tih hriat lohten lungin an lo vawm a ni. Driver-te chu beih an tawhna hmun aṭang hian an insaseng thei a, Tikrikilla police station-a police-te hnenah thil thlen dan chungchang hi an hriattir a ni.

Beih an tawhna hmunah hian police-te chu kal nghalin, pawikhawihtute erawh an lo tlanchhe hman a ni. Bus-a chuangte chuan he inbeihnaah hian mi 10 aṭanga 12 vel an inhnamhnawih nia sawiin, pawikhawihtute hian tihluihna hmanga bus tih din leh an neih theih laksak an tum nia an rin thu an sawi. Police-te chuan chanchin ziah a nih lai hian he thil thlen chhan hi an la finfiah lo.

Tikrikilla police-te chuan chhuizuina an neih chhunzawm nghal a, bus-te hi darkar hnih hnuah police venhimna hnuaiah Mankachar lam pan tura kal phalsak an ni. He thil thleng hian Guwahati-Mankachar kawnga zanrei lama passenger leh driver-te himna chungchangah hlauhthawnna nasa tak a thlen a ni.