Tripura: Eklavya Model Residential School 6 hawn belh dawn

Tripura sorkar chuan kumin November thla chhungin Eklavya Model Residential School (EMRS) paruk hawn belh a tum tih senior official chuan September 19, Inrinni khan a sawi. Tun dinhmunah hmarchhak state-ah EMRS 12 a awm mek a ni.

Tribal Welfare director Subhasish Das chuan, sikul thar paruk sak hna zawh fel a nih tawh thu leh, hna tenau ṭhenkhat tih loh chu zawh fel a ni tawh tih a sawi. National Education Society for Tribal Students (NESTS)-in EMRS awmsa aṭanga zirtirtu leh non-teaching staff dah thar an nih hnuah sikul chu hman ṭan a ni dawn tih an sawi. Entrance test pawh zawh fel a ni tawh tih Das chuan a sawi bawk.

Das chuan EMRS campus thar sakna atan hian Central Public Works Department (CPWD) bakah, construction agency dangte pawh tel tir turin state sorkar chuan phalna a dawng tawh tih a sawi. CPWD-in EMRS sakna atana sum a ruahman chu Rs vbc 70 chuang a nih thu leh, NESTS chuan sikul pakhat zel sakna atan Rs vbc 50 a pawm tih a sawi bawk. Tripura Housing and Construction Board (THCB) chuan he campus sakna atan hian Rs vbc 54 vel sen a nih an rin thu an sawi.

NESTS chuan Khowai district-a Mungiakami leh North Tripura district-a Dasda-a EMRS campus thar sakna atan Rs vbc 100 a sanction a, sikul tin tan Rs vbc 50 a ruahman a ni. Sum senso tur dang a awm a nih chuan state sorkarin a tum dawn tih Das chuan a sawi bawk.