Manipur : Congress-in sorkar hna ruak chungchangah ‘Meri Degree Ka Kya?’ campaign buatsaih

Manipur Pradesh Youth Congress chuan Inrinni khan, 'Meri Degree Ka Kya?'campaign buatsaihin, state Chief Minister chenna in lam panin kawng zawh huaihawt a ni a, sorkar hna post ruak awmte hnawhkhah an phut bakah, state-a recruitment system siamṭhat an phut bawk.

Kawngzawh hi Congress Bhavan aṭanga ṭan a ni a, All India Youth Congress National general secretary Tarh Johny leh Manipur Pradesh Youth Congress president Anand-te chuan kawngzawh hi an kaihruai a ni. Chief Minister chenna in bulah police-te chuan pungkhawmte hi lo dan an tum a, mahse, Chief Minister chenna in hi an pan chhunzawm a, hemi hnuah Congress Bhavan-ah an kir leh a ni.

Youth Congress chuan state-ah sorkar hna post 50,000 chuang hnawh khah lohin a awm niin an sawi a, heng hna ruakte hi a rang lama hnawhkhat turin an phut a ni. Ṭhalai thiamna sang tak neiten hnathawh tur lamah harsatna an tawk tih sawiin, hnaruak hnawhkhat tura ruahmanna siam leh, langtlang zawka kalpui a nih theihna atan hma lak an tum thu an sawi. Tarh Johny chuan campaign-in a tum ber chu ṭhalai hna nei lo lehkhathiam tak tak ten harsatna an tawh tarlan a nih thu sawiin, an thil phut tihhlawhtlin sak tura sorkar an phut thu a sawi.