Nagaland : NE NEP Conclave hmasa ber thleng

North East National Education Policy (NEP) 2020 Conclave hmaasa ber chu nimin khan Nagaland-ah neih ṭan a ni a, vawiinah chhunzawm a ni ang.

JP Parks and Banquets, Naga United, Chümoukedima-a NEP Conclave-ah hian hmarchhak state pariat aiawhte telin, NEP 2020 kalpui dan leh, hmarchhak bial tana harsatna awm thei chi hrang hrangte an sawi ho dawn a ni.

Conclave ṭan hmaa Dimapur-a chanchinthar lakhawmtute kawmnaah, Nagaland higher education minister Temjen Imna Anglong chuan conclave chu hmarchhak state-te platform ṭha tak, NEP 2020 awmnze nei taka kalpui a nih theih dan tur duanna hun ṭha tak a ni dawn tih a sawi lawk a ni. Higher education tan bik chauh ni loin, school and technical education, innovation, technology, skills, leh management lam thlenga a huam tur thu a sawi.

Minister Along chuan hmarchhak bialin ram leilung dinhmun avanga harsatna hrang hrang an tawhte tarlangin, hengte hi sorkar laipui hnenah a huhoa an thlen pawh a pawimawh dawn hle tih a tarlang.

Conclave-ah hian hmarchhak state hrang hrang aṭangin officer 36 velin, an state-a NEP 2020 kalpui dan leh an dinhmunte an sawifiah ang. Sorkar leh private hnuaia school, college leh university aṭangin zirlai 300-400 vel an tel dawn bawk a ni.