Manipur: IDP 31,000 an chenna inah kir leh tawh

Manipur-a hnam leh hnam inkara buaina a chhuah avanga chenna in leh lo chhuahsan, internally displaced persons (IDP) zinga a chanve aia tam chu an chenna inah an kir leh tawh a, state sorkari Ministry of Home Affairs (MHA)-in a pawmpui, Rs vbc 1,347.78 in puihbawmna leh chhawmdawlna a kalpui tih State Home Department report chuan a tarlang.

Kum 2023 May thlaa buaina a chhuah aṭangin IDP-te puihbawmna atan Rs vbc 949.63 sanction a ni tawh a ni. Kum 2023-24 chhung khan Rs vbc 400.24 hman niin, kum 2024-25-ah Rs vbc 424.36 hman a ni a, kum 2025-26-ah Rs vbc 532 hman a ni bawk. Financial year 2026-27 atana sum hman tur hi tihchhuah a la ni lo a, state sorkar chuan Rs vbc 99.214 a seng tawh a ni.

Kumin September 3 thleng khan IDP awm zat chu 28,899 ah tlahniamin, relief camp 105-ah mi 24,530 an awm a, sorkarin chenna tur lailawk a siamsakah mi 4,369 an awm bawk. Bishnupur district chu relief camp-a awm tamna ber niin, camp 41-ah mi 7,892 an awm. Churachanpur-a camp 19-ah mi 5,195 awmin, Imphal West camp 13-ah mi 4,395 an awm. Kangpokpi-a camp 12-ah mi 3,389 awmin, chenna lailawk siamsakah mi 2,506 an awm bawk.

Hetih lai hian Tengnoupal-ah relief camp-a awm an awm tawh loa, mahse chenna tur lailawk siamsakah mi 1,290 an awm mek bawk. Sorkar data tihchhuahah IDP 31,832 chu an chenna inah an kir leh tawh tih tarlan a ni. Thuneitute chuan chenna in 7,034 an sak bakah, chenna in tihchhiat 4,159 an sa ṭha bawk a ni.