Tripura: Sorkar sikul zirlaite tan AI zirna tlangzarh

Tripura sorkar chuan sorkar sikul zirlaite Artificial Intelligence (AI) zirna pekna turin state level-a hmalakna a kalpui a, he hmalakna hian hun lo awm tur atana lo inzir lawkna, technology thar leh digital lam thiamna ṭhuam ṭhat chhoh zel a tum a ni.

He hmalakna hi 'AI Utsav - Skill Competition 2026' hnuaiah, Tripura district pariat huam chhunga sorkar sikul hrang hranga pawl ruk aṭanga pawl 12 zirlaite tan kalpui a ni. Ministry of Skill Development and Entrepreneurship chuan national digital skilling platform, Skill India Digital Hub (SIDH) kaltlangin AI course a thlawna pek an ni ang. Skill Development director Pradeep Krishnaraj chuan, sorkar sikul 1,920 vela pawl ruk aṭanga pawl 12 zirlaite a huam dawn tih a sawi.

Zirlai hlawhtling taka course zir zote chuan Skill India Digital Hub aṭangin national certificate an download thei dawn a, AI lam thiamna ṭha zawk pek an ni dawn a ni. Krishnaraj chuan he hmalakna hmang hian, zirlaite chu kum naupangte an nih lai aṭanga technology lam thiamna pek an nih dawn thu leh, digital thiamna lama inrintawkna an neih theihna tur a ni a, a ti. Hei bakah sorkar chuan India Skills Competition atan ruahmanna chipchiar tak a siam bawk a, khawvel pum huap WorldSkills ecosystem zulzuia siam a ni. He ruahmanna hian state ṭhalai zinga mithiam hriatchhuah, zirtirna leh hma hun atana inbuatsaihna tur ruahmanna felfai tak siam a tum a ni.