Manipur: Helpawlin Chawangkining Naga khua an bei

Manipur-a Kangpokpi district-a Chawangkining Naga khua chu Thawhlehni zan khan helpawl nia rinhlelhten an bei a, security force-te nen silaia an inkah bakah, chenna in pahnih vel hal a ni tih official-te chuan nimin September 16 khan an sawi. He inbeihna hi zan dar 10:30 vela thleng a ni a, helpawl member ṭhahnem tak ralthuam kengte chuan khua hi an bei a, silai hmehpuah a nih hnuah helai hmuna awm CRPF-te'n an chhang let ve nghal a ni.

Official-te chuan darkar ruk dawn silaia inkah a nih thu leh, nimin zing dar 4:30 vel thleng khan silai hmehpuah a ni tih an sawi. Security force-te chuan helpawlte hi khuaa lut thei loin an dang a, khaw pawn lama thinga sak chenna in pahnih an hal a ni. He inbeihna hi Tamenglong district-a Leisangphai khuaa Kuki hmeichhia pakhat kahhlum a nih hnua thleng niin, Naga Peoples' Front legislator leh Naga hruaitu hlun, Awangbou Newmai chuan inthahna thleng leh, Chawangkining-a chenna in hal a ni chu na taka a dem thu a sawi. Hetianga chetna hian khawtlang tan rah ṭha a chhuah ngai lo, a ti.

Kangpokpi-a Saikul bial Kuki MLA pawhin, hmeichhe pahnih thah an ni chu a dem thu leh nunrawn thlak a tih thu sawiin, an mi thah pakhat zawk chu tun hnai khan nursing a zir zo niin a sawi. MLA chuan NSCN-IM leh ZUF-K cadre-te chu he tualthahnaah hian an inhnamhnawih niin a puh.