Meghalaya-a HIV vei ram puma vei zat aiin a let hnihin an tam: CM Sangma

Meghalaya chief minister Conrad K Sangma chuan September 15 khan, state chhunga HIV vei zat chu ram pum huap aiin a let hniha an tam thu leh, he natna do kawngah mitinin mawhphurhna an nei tih a sawi. Meghalaya State Council on AIDS meeting hmasa ber a kaihhruainaah, Sangma chuan state-a HIV vei zat chu state mipui zat aṭanga 0.40% a nih thu leh, ram pum huap chuan 0.20% a nih thu a sawi.

Meghalaya-ah hian kum 2010 aṭang khan HIV kai 58.74% in an pung tawh a, nitin kai thar mi pasarih dawn an awm. Tun dinhmunah HIV vei mek zingah nu naupai 60 an awm tih Sangma chuan a sawi. Kum 2010 aṭang khan HIV vanga thi chu 61.18% ah a tlahniam a, HIV vei 77.2% chauhin enkawlna an dawng tih a sawi. CM chuan sum lama harsatna leh, inenhranna thleng ṭhin chuan inenkawlna kawngah harsatna nasa tak a thlen tih a sawi bawk.

Sangma chuan HIV vei mi 2,381-te chu enkawlna pek hmabak an nih thu leh, state-a he natna vei enkawlna thuam chak a pawimawh thu a sawi. HIV test leh enkawlna service huang zauh tum a ni a, sorkar chuan mahnia in test theihna leh index partner testing tihpun a, mobile Integrated Counseling and Testing Center (ICTC) thuam chak, Anti-Retroviral Therapy (ART) centre thar din leh damdawi damlote hnena deliver theih a tum a ni. Chief Minister chuan ṭhalaite hnenah awareness campaign uar zawka neih a pawimawh thu a sawi bawk a ni.