Nagaland: NSF-in NH-29 project thawktu NHIDCL thlak turin ngen

Naga Students’ Federation (NSF) chuan sorkar laipui leh Nagaland sorkar hnenah NH-29 Dimapur-Kohima kawng siam hna thawktu, National Highways and Infrastructure Development Corporation Limited (NHIDCL) thlak turin an ngen a, hei hi an hnathawh dan ṭhat tawk loh vang leh, hun rei tak tihkhawtlai bakah enkawl zuina ṭha pek a nih loh vang tih an sawi.

September 13-a thuchhuah an siamah, NSF chuan project chu National Highways Authority of India (NHAI) emaw, Public Works Department (National Highways) emaw kuta hlan chhawng turin an ngen a ni. NSF chuan highway-a veivakten harsatna nasa tak an tawk ṭhin tih tarlangin, ruahtui tlak tam lai leh zan lamah harsatna an tawk nasa zual tih an sawi. Helai kawnga lung tla leh lirthei chesualah mi eng emaw zatin nunna an chan tawh a, ṭhenkhat hliam na tak tuar an awm ṭhin nia sawiin, hei hi hnathawh ṭhat tawk loh vangah an puh a ni.

Medziphema-Peducha kawng chungchang pawh tarlangin, NSF chuan kawng chhia, tui luankawr ṭha tawk lo, kawng sira structure chhia, venhimna ṭha lo leh siamṭhat hna thawh tihkhawtlai a ni tih an tarlang a, lirtheia veivakten harsatna an tawk tih an sawi. NSF chuan Dimapur-Kohima project kalpui dan leh enkawl dan chu Ministry of Road Transport and Highways chuan a rang thei ang bera chhui chiang turin an phut. Package-II a hnathawh zawh a nih hmaa completion certificate pek chhuah a nih chungchangah zawhna an siam bawk.