Meghalaya: KSU Shillong East Circle president man

Meghalaya Police-te chuan August 19-a Shillong hmun hrang hranga bike rally-a buaina chhuak chungchangah, Khasi Students’ Union (KSU) hruaitu pakhat man belhin, he thubuaia KSU hruaitu man zat chu paruk an tling tawh a ni. An mi man thar ber hi KSU Shillong East Circle president a ni a, Meghalaya police Special Investigation Team (SIT) chuan Zirtawpni tlailam khan NEIGRIHMS bulah an man tih police officer pakhatin a sawi.

An mi man hi Inrinni khan local court-ah a inlan a ni. KSU hruaitu an man zinga pangate pawh judicial custody-ah dah mek niin, an thubuai ngaihtuah mek a ni. August 19-a bike rally buatsaih hi East Khasi Hills district thuneitu chuan phalsakin, mahse he rally-ah buaina chhuah chhunzawmin, lirthei eng emaw zat tihchhiat a ni. Official-te chuan he buaina chhuakah hian lirthei 31 vel tihchhiat a nih thu leh, chung zingah chuan Assam lirthei an tel tih an sawi a, mi 18-in hliam an tuar bawk.

He thil thleng hian Assam leh Meghalaya inkarah buaina tichhuakin, Assam-a transport operator-te chuan Jorabat leh Khanapara-ah Meghalaya lirtheite an dang a ni. Police-te chuan KSU hruaitute hi Meghalaya Maintenance of Public Order Act, Prevention of Damage to Public Property Act leh Bharatiya Nagarik Suraksha Sanhita (BNSS) thupek angin dan loa vantlang thil tihchhiat leh, thil dang bawhchhiatna kaihhnawihah thubuai an siamsak a ni.