Arunachal: Balhla tih hminna tura chemical hman chhui chiang

Arunachal Pradesh Police-te chuan Naharlagun-ah chemical hmanga balhla artificial-a tih hmin tum nia sawi chhui hna an thawk ṭan a, he thil hi social media-a video theh darh a nih hnuah thuneitute chuan dan angin hma an la a ni. Naharlagun-Itanagar police superintendent, Nyelam Nega chuan video hi theh darh a nih hnuah Thawhlehni khan thuneitute hriattir an nih thu a sawi.

Complaint an dawn chungchangah Naharlagun police station officer-in-charge, K Dev chuan Nilaini khan Bharatiya Nyaya Sanhita (BNS) leh Food Safety and Standards Act, 2006 hnuaiah FIR a theh lut a ni. He video theh darha balhla tih hminna tura chemical an hman dik tak chu hriat chian a la nih loh thu leh, scientific exam leh chhuizuina kimchang zawk hmanga hriat a ni dawn tih Nega chuan a sawi. Police-te chuan video-a balhla tih hminna tura an thil hman chu ei leh in himna dan bawhchhiatna a nih leh nih loh an enfiah mek bawk.

Nega chuan ei leh in himna dan bawhchhiat a nih chuan, dan anga khauh taka hma lak a nih tur thu a sawi. Chhuizuina an neihah he thila inhnamhnawihte hriat chhuah tum a ni dawn bawk a ni. Thuneitute chuan scientific exam leh evidence dang aṭangin chemical hi eng ang chiah nge tih leh, he an puhna hi a thudik a nih leh nih loh an finfiah dawn a ni.