Meghalaya: State-a hnathawk tura lut inziah luh khauh zawkin kalpui

Meghalaya labour minister Methodius Dkhar chuan, September 9 khan state-a hnathawk tura lutte inziah luh leh venhimna tur dan siamṭhat a tlangzarh. He hmalakna hmang hian sorkar chuan state pawn mite hnathawhna hmun a hriat chian theih nan leh, ṭanpuina pek kawngah a pui thei dawn tih Minister chuan a sawi.

State level Meghalaya Identification, Registration, Safety and Security of Migrant Workers (MIRSS) Rules, 2020 siamṭhat chungchanga state-level launch-cum-orientation programme-a thu a sawiah, Dkhar chuan state-a hnathawk tura lut inziah luh chuan, hnathawktu emaw hnathawhna hmun neitute chu harsatna siam loin hnathawktute hamṭhatna a tichak tur a ni, a ti. Inziah luh pawimawhna sawilangin, sorkarin state pawn lam mite hnathawhna hmun a hriat theih bakah a pui thei a ni, a ti.

He dan siamṭhat hi Tara Ghar-a State Guest House-ah tlangzarh a ni a, pawisa pek theihna tur e-payment gateway siam nghal niin, MIRSS Amendment Act and Rules kalpui dan tur Standard Operating Procedure (SOP) siam a ni bawk. Dkhar chuan he dan hi hlawhtling taka kalpui a nih theih nan police, district thuneitu, employer, contractor, trade union, civil society organization leh migrant worker-ten thawh hona ṭha tak an neih phut a ni. Deputy Commissioner leh district-level official-te chu Labour Department official-te nena thawh hona ṭha nei turin a ngen a; awareness, facilitation, endikna leh dan kalpui chu thil pawimawh ber a nih tur thu a sawi bawk.