Assam: Goalpara khua aṭangin chhungkaw 73 sawn chhuak

Assam-a Goalpara district thuneitu chuan nimin, Thawhṭanni khan Matia Revenue Circle hnuaia khaw pangaah chhungkaw sawn chhuah beihpui thlakna an nei a, heng khua aṭang hian chhungkaw 73 sawn chhuah an ni. He beihpui thlakna hi zing dar 8 vel khan Harimura, Bhojmala Tengabari, Paschim Bhelakhamar, Kharija Manikpur leh Jotsarwadi-ah te neih a ni. Beihpui thlaknaah hian excavator 10 vel hman niin, venhimna kalpui turin police contingent dah a ni bawk.

District thuneitu chuan heng chhungkuate hian dan loin loneihna ramah an awm thu leh, phalna nei loin chenna inte an sa tih a sawi. Official-te chuan tui dahkhawlna loneihna atana hman tur khar a nih avangin, helai biala loneih hnathawh a tibuai niin an puh bawk. Chhungkaw ṭhenkhat chuan sawn chhuah an ni thu an lungawi loh thu an sawi a, Barpeta district-a tuilianin an chenna in leh loneihna hmun a tihchhiat avangin helai hmunah hian an insawn tih an sawi.

Chhungkuate chuan Bagbor leh, Mandia biala an thlahtute aṭanga an thil rochunte chu kum 2017-a Brahmaputra luilian avanga an chan thu leh, hemi hnuah Goalpara-a an ram leiah an khawsa chhunzawm tih an sawi. Hei bakah thuneituten hriattirna an pek dan chungchangah an lungawi loh thu leh, an chenna in chhuahsan turin hun tlemte pek an nih thu an sawi bawk. Helai hmun aṭanga sawn chhuah chhungkaw eng emaw zat tuilian avanga insawn chhuak an nih hlawm avangin harsatna an tawk tih an sawi bawk.