Meghalaya: Vice President-in project lungphum phum dawn

India vice president C P Radhakrishnan chuan vawiin, September 7 hian infrastructure project panga, Rs vbc 1,010.95 senna tur lungphum a phum dawn tih official-ten an sawi. Project zingah hian tui supply, kawng siam, healthcare leh power infrastructure-te an tel.

Project zinga lian ber chu New Shillong Water Supply Scheme Phase II a ni a, Rs vbc 850.58 vel senna tura ruahman a ni. New Shillong City leh a chhehvela khaw 32-ah tui supply pek tum a ni a, hei hian mi nuai 4.34 vel leh chhungkaw 86,900 vel a huam dawn a ni. Scheme-ah hian Meghalaya-a city-scale smart metering leh, volumetric water billing system hmasa ber kalpui a ni dawn bawk a ni.

Radhakrishnan hian Umngot lui chunga metre 110-a thui lei dawhna tur lungphum a phum dawn bawk a, Rs vbc 21.86 senna tur nia chhut a ni. He lei dawh hian Mawynrew Block-a khaw 14-te inkalpawhna a tichangtlung thei dawn a, mi 28,479 velin an chhawr ṭangkai dawn bakah, East Khasi Hills leh West Jaintia Hills inkalpawhna pawh a thuam chak dawn a ni. He lei hian Shillong leh Jowai inkara veivakte tan kawng dang a siam theih beisei a ni a, market leh service pawimawh tak takte a ti changtlung dawn bawk.

Project dang zingah Pilangku-A, Jyrmang, Chibra leh Mawiong kaltlanga Umsen leh Barapathar inkar kawng km 13.5-a thui kawng siam pawh a tel. He kawng hi khaw 21-a mi 5,705 velin an chhawr ṭangkai beisei a ni a, Meghalaya leh Assam inkalpawhna pawh a tichangtlung dawn a ni. Project zingah hian Shillong Civil Hospital-a khum 30 awmna, AYUSH facility sakna atan Rs vbc 10 dah a ni bawk. Helai hmun hian Ayurveda, Homoeopathy, Yoga leh Naturopathy, Panchakarma, physiotherapy, rehabilitation leh inpatient care bakah service a pe dawn a ni.

Project pangana hi Rs vbc 72.5 senna tur power infrastructure a ni a, Mawkhanu-ah 2x50 MVA, 132/33 kV substation, Saisiej-ah 132 kV double-circuit transmission line leh, a kaihhnawih GIS infrastructure-te a tel bawk.