Anti-Narcotics Task Force din a ni dawn: Assam CM

Assam chief minister Himanta Biswa Sarma chuan September 3 khan, Assam police-ten ruihhlo do kawnga an hmalakna thuam chakna turin, Anti-Narcotics Task Force din a nih tur thu a puang. Hei hi state-a ruihhlo hluar chho zel do kawnga chak zawka hmalakna tur a ni. He thu hi Dergaon-a ni hnih awh SSP Conference neih zawh hnua press conference-ah sawiin, CM chuan force hi thla leh chhunga din a nih a beisei thu leh, NDPS Act khauh zawka kalpui a nih theih nan hmalak a tum tih a sawi.

Chief Minister chuan task force-ah hian specialized vertical a awm dawn a, chung zingah chuan legal leh financial unit a tel dawn tih sawiin, hemi hmang hian ruihhlo kaihhnawih avanga mante bail na leh, ruihhlo cartel puibawmtu financial network-te lakah hma an la dawn a ni. Sarma chuan chargesheet thubuaia thiam loh chantirna rate-in hma a sawn thu leh, kum 2020-a 7% vel aṭanga tun dinhmunah 29.3%-ah a pung tih a sawi. State sorkar chuan kumin kum tawp lamah thiam loh chantir zat chu 35%-a tihpun a tum tih a sawi bawk.

SSP conference-ah hian hmarchhak biala ruihhlo tawlhrukna hluar zel sawi ho a ni bawk. Sarma chuan ruihhlo phurh chhuahna atana transit route hman ṭhinah ngawrh taka endikna neih a pawimawh thu leh, Assam police-te chuan Mizoram, Manipur leh Arunachal Pradesh-te nen thawh hona ṭha tak an neih a pawimawh thu a sawi. Conference-ah hian Assam Police chhungah battalion thar pahnih din rel a ni bawk a ni.