Meghalaya: HC-in Shillong bike rally-a buaina chhuak chhuizui dan enfiah ṭul ti

Meghalaya High Court chuan August 19-a Khasi Students' Union (KSU)-in Shillong-a bike rally an buatsaihnaa buaina chhuak kaihhnawiha pawikhawihtu man an tlem avangin chhuizuina neihdan enfiah a ṭul tih sawiin, he thil thlenga mi pali chauh man an nih chungchangah hian thil tihchhiat leh pawikhawihna nasa tak thleng chu a in mil lo tih a tarlang.

Chief justice Tevati Mohite Dere leh justice W Diengdoh-te awmna division bench chuan September 2, Nilaini khan thil thleng chungchangah suo motu PIL chu ngaihtuahin, bench chuan chhui chianna kalpuidan chu a lungawi thlak loh thu leh, buaina chhuaka inhnamhnawih nia sawite chu man chhuak a, hma la turin police-te a hriattir. Court hnenah hian Shillong-a station eng emaw zatah police-te'n FIR 22 an ziak lut tih hriattir a ni. Chung zinga pakua chu Rynjah police station-ah theh luh a ni a, Mawlai-ah pasarih, Shillong Sadar-ah pali, Laitumkhrah leh Lumdiengjri-ah pakhat ve ve theh luh a ni bawk.

Police-te chuan an mi man palite chu Khasi Studentsâ Union (KSU) hruaitute an nih thu court-ah hian thlenin, thuneitute chuan buaina chhuak kaihhnawihah hian lirthei pahnih an man tawh bawk. Chhuizuina kalpui mek zingah police-te chuan mobile phone pariat aṭanga data an endik mek a, hmun 27 aṭanga CCTV recording an hmuhte an enfiah mek bawk a ni. Court chuan police-te chu rally buatsaih a nih lai hian buaina chhuak veng turin a rang lama hma an lak leh lak loh an zawt bawk. Court chuan pawikhawihnaa inhnamhnawihte chu hriat chhuah a, dan anga hremna pek a ṭul tih an sawi a ni.