Assam: Sorkarin police 15,000 - 20,000 vel lak belh dawn

Assam sorkar chuan state ṭhalai nuai hnihte hnena sorkar hna pek a tumna kawnga hmalakna a kalpui mek zingah, kum nga chhungin police 15,000 aṭanga 20,000 vel lak belh a tum. Chief minister Himanta Biswa Sarma chuan he thu hi nimin, Nilainia Dergaon-a Lachit Borphukan Police Academy (LBPA) passing-out parade-ah a sawi a ni.

CM Sarma chuan state sorkarin kum nga chhunga ṭhalai nuai hnihte sorkar hna pek an nih theihna tura thutlukna a siam hnuaiah, hun bituk chhungin police 15,000 aṭanga 20,000 vel lak belh theih a nih a rin thu a sawi. Kum nga liam ta chhung khan police officer leh constable 21,000 vel lak an ni tih a sawi bawk. Sarma chuan Assam police chu 'zero-vacancy' force-a siam tumin hma a la mek tih a sawi.

Pawikhawihna thleng ṭhin venhim chungchangah Sarma chuan, state-ah hmasawnna tam tak a awm thu leh, kum 2021-a crime rate 379 aṭangin kum 2024 July thlaah 116-ah a tlahniam tih a tarlang. Thubuai ziah luh 1,33,239 aṭangin 25,000 velah a tlahniam tih sawiin, charge-sheet rate 86.85%-ah a kai chho a, conviction rate pawh 30% velah a kai chho tih a sawi bawk. State-a ruihhlo do beihpui thlak kawnga hmalak a nih dan tarlangin, Sarma chuan Assam police-ten kum nga liam ta chhung khan ruihhlo Rs vbc 3,254 man hu an man tawh a, mi 26,537 an man tawh tih a sawi. Ruihhlo kaihhnawih thubuaia thiam loh chantir zat chu 57% a tling tawh tih a sawi a ni.