Meghalaya: A fahrawn pawngsualtu kum 30 lung-in tang turin hrem

Meghalaya court chuan Teren Mawlieh chu a fanu hrawn kum tling lo a pawngsual avangin kum 30 chhung hrehawm taka lung-in tang turin a hrem. He thubuai hi kum 2020 khan East Khasi Hills district-ah ziah luh a ni a, Shillong-a Special POCSO Court special judge (POCSO), MK Lyngdoh kaihhruaina hnuaiah Mawlieh hi August 28 khan Maawngap police station-a thubuai ziah luhah thiam loh chantir a ni.

East Khasi Hills Police Superintendent chuan kum 2020 December 7 khan Mawlieh hi a fanu hrawn kum tling lo a pawngsual nia puh a nih hnuah FIR ziah luh a nih thu a sawi. Police-te chuan Indian Penal Code section eng emaw zat leh, Protection of Children from Sexual Offences (POCSO) Act hnuaiah thubuai an ziak lut a ni. Mawlieh hi police-ten chhuizuina an neih laia man a ni a, hemi hnuah police-te chuan kum 2021 February 5 khan chargesheet an theh lut bawk.

Court chuan POCSO Act Section 4, 6, 8 leh 10 hmangin thiam loh a chantir a, a thil tihsualah hremna hran siam a ni bawk. Kum 20 chhung lung-in tang tur leh, Section 4 hnuaiah Rs 30,000 chawitir niin, pawisa a pe lo a nih chuan a lung in tan hun chhung thla thuma pawhsei theih a ni. Hei bakah POCSO Act Section 6 hnuaiah kum 30 chhung hrehawm taka lung in tang tur leh, Rs 40,000 chawi tura tih a ni a, pawisa a pe lo a nih chuan a lung-in tan tan hun chhung thla lia pawhsei a ni bawk ang. Court chuan Section 8 hnuaiah kum nga chhung lung-in tang tur leh, Rs 10,000 chawi turin a hrem bawk a, pawisa a pe lo a nih chuan thla khat dang lung-in tan tir a ni bawk ang.