Assam : Thla 4 chhungin jail tang mi 226 HIV vei hmuchhuak

Assam-a jail 31-a tang 226 chu thla li liam ta chhung khan HIV an vei tih hmuhchhuah a ni a, chief minister Himanta Biswa Sarma chuan tang zingah hian HIV vei pakhat tal report an awm a nih chuan, chipchiar taka enfiah turin thupek a chhuah. Sarma chuan state sorkarin he thil hi a ngai pawimawh hle tih sawiin, jail tanga zinga HIV vei kai dan kimchang taka hriat a pawimawh thu a sawi. Jail tang HIV veite damdawi lama enkawlna mumal tak an dawn theihna turin sorkarin a buaipui dawn tih a sawi bawk.

CM Sarma chuan jail tang zinga HIV vei hmuh chhuah a nih thu hriattir a nih chungchang tarlangin, a ngaih pawimawh hle thu a sawi. Gauhati High Court pawhin he thil hi a ngaihven hle tih a sawi bawk. Chief Minister chuan jail tang zinga HIV vei report an awm chungchangah hian jail-ah test neih chhunzawm zel a nih theihna turin hma lak a ni dawn tih a sawi. Sarma chuan HIV vei report an awm chungchangah hian chipchiar zawka zirchian a nih tur thu a sawi.

Sribhumi District Jail-ah pawh HIV vei awmin, tang 11-te chu HIV vei an ni a, an zingah hian hmeichhia pakhat pawh a tel. Tun dinhmunah jail-ah hian tang 445 awmin, mi 187 awm theihna tura ruahman a ni a, hei vang hian jail pawh a tawt hle nia sawi a ni. Thuneitute chuan tang zinga HIV vei tam zawk chu Narcotics Drugs and Psychotropic Substances (NDPS) Act hnuaia man an ni tih an tarlang. AIDS Control Committee member-te chuan jail tang HIV veite enkawl turin jail hi an tlawh fo bawk a ni.