Meghalaya : Gang member nia rinhlelh mi 4 kaphlum

Meghalaya-a East Garo Hills district-a Songsak huam chhunga Pathiannia naka-checking operation neihnaah, police-te chuan gang member nia rinhlelh silai keng mi pali kahhlum an ni tih police-ten an sawi. He inbeihna hi zing dar 4 vela thleng a ni a, naka enkawltu police-te chu Dagal-Songsak kawng dunga Songsak Reserve-a checkpoint endik tura an pan laiin heng mi palite hian an lo kap tih East Garo Hills-a district police hotu, Swapnil Pawar Vasantrao chuan a sawi.

Heng mi palite hi Bolero registration number AS-01-FD-2889-ah chuangin, security check tura an din loh avangin silai keng mi palite chuan police-te chu an kap a ni. Police-te chuan chhanglet ve nghalin, gang member nia rinhlelh palite hi kah hliam an ni a, an hliam tuar loin a hnuah an thi tih Vasantrao chuan a sawi. Silaia an inkahnaah hian police motor pawh kah a ni bawk.

Mitthite hi North Garo Hills district-a cheng Allason Marak, Assam-a Goalpara district-a cheng Sustom Rabha, Kalam Ali leh Bobidul Islam-te an ni a, Vasantrao chuan Marak hi tunhnaia Damra-a inkahna thlenga sumdawngmi kahhlum a nih ṭuma a bultumtu zingah a tel thu thu leh, Rabha chu Assam leh Meghalaya-ah pawikhawih thubuai tam tak a nei tih sawiin, a pawikhawih zingah hian rukruk, mi rukbo leh Arms Act hnuaia dan zawm lohnate a tel.

Kalam Ali pawh hian section hrang hrangah mi rukbo, dan loa pawisa khawn leh pawikhawihna dang eng emaw zatah a inhnamhnawih tih police official chuan a sawi. Police-te chuan mitthite kut aṭang hian factory-a siam pistol pahnih leh a mu an hmuchhuak tih Vasantrao chuan a sawi bawk.