'Sikkim for Nepal' relief mission vailiam

Sikkim chief minister Prem Singh Tamang chuan August 31, Thawhṭanni khan Nepal-a tuilian tuarte chhawmdawlna mission, 'Sikkim for Nepal' tih chu a vailiam a, he mission hmang hian tuilian leh lei tawlh nasa tak thleng avanga harsatna tawkte hnenah an mamawh turte leh damdawi lama ṭanpuina an thawn a ni.

Sikkim Krantikari Morcha hnuaia buatsaih, relief convoy hi Nepal hmun hrang hranga ruahtui tlak nasat avanga tuilian leh leitawlh nasa tak thlenga harsatna tawkte puihbawmna leh chhawmdawlna tur a ni. Tibet leh Nepal ramri bula Bhotekoshi River bial hi a tuar nasa ber zingah telin, hmun eng emaw zatah chenna in leh infrastructure a tichhe nasa hle bawk. Thuneitute chuan chian hriat loha awm mekte zawn chhuah tumin hma a la a, chhanchhuah leh chhawmdawl hna thawh chhunzawm zel a ni bawk.

Relief team-te a vailiam rual hian CM Tamang chuan, tuilian avanga an chhungkaw member chante chu a tawrhpui thu a sawi a, he chhiatna thleng vanga hmun him lama insawnchhuakte pawh puihbawm zel an ni dawn tih a sawi. Hun rei tak chhung Sikkim leh Nepal inkara hnam ziarang leh an chanchina inzawmna an lo neih tawhte a tarlang bawk a ni. He hmalakna hi India hmarchhak biala khuarel chhiatna thleng avanga harsatna tawkte chhawmdawlna kalpui mek zinga mi niin, tuilian leh leimin vangin Assam, Arunachal Pradesh leh Sikkim-te chuan Nepal-ah hian ṭanpuina an pe chhuak tawh a ni.