ILP-in hmasawnna a thlen rualin Naga nihna a humhim tur a ni : Nagaland CM

Nagaland chief minister Neiphiu Rio chuan August 29 khan Inner Line Permit (ILP) system chu hman ngei ngei tur a nih rualin, state identity, ram, culture leh leilung fate dikna chanvo humhalhna atana hmanraw ṭangkai tak, hmasawnna leh economy ṭhanlenna atana pawimawh tak a nih a ṭul thu a sawi.

Dimapur Town Hall-a Bengal Eastern Frontier Regulation (BEFR) Act, 1873 chungchanga national seminar buatsaiha thu a sawiah, CM Rio chuan Nagaland chu leilung fate dikna chanvo humhalh, leh economy ṭhanlenna tura mipuiin eizawnna an duhzawng an thlan theihna tura phalna pek a nih thu a sawi. He BEFR 1873 hmang hian India khua leh tui, Naga leilung fate leh economy hmasawnna tura thawh hona a humhim thei dawn tih a sawi bawk.

Chief minister chuan Nagaland chu inla hrang lo a, mi dang thawhpuina tura huang a zauh a pawimawh thu a sawi a, leilung fate humhalh an nih rualin hmasawnna kalpui a ṭul tih a sawi. Rio hian ILP chu Dimapur, Chumoukedima leh Niuland-ah huang zauh a nih thu a sawi bawk. Gauhati High Court-ah mi ṭhenkhatin ILP huang zauhna tur hi duh loin an dodal a, mahse court chuan state sorkarin district pathuma permit system siam tura a thutlukna siam chu a pawmsak a ni.