Tuilianin vanga Nepal-a tang Assam mi leh sa hruai kir tumin hma lak mek a ni : Assam CM

Assam chief minister Himanta Biswa Sarma chuan nimin Zirtawpni khan, Nepal-a tuilian leh chirh tawlh nasa tak thleng avanga state mi leh sa Nepal-a tangkhang mekte himna tur leh, state-a hruai kir an nih theihna turin hmalak mek a nih thu a sawi. CM Sarma hian Nepal-a tangkhang emaw, chin hriat loh emawa awm zat erawh a sawilang lo.

Sarma chuan Nepal-a tuilian avanga state khua leh tui tangkhang mekte chu an hriat reng thu leh, an chhungte nen inbiakna an nei tih sawiin, an himna tur leh a rang thei ang bera hruai haw an nih theihna turin agency hrang hrangte nen thawh hona ṭha tak an nei tih Ningani khan X-ah a post a ni. Assam chief secretary Ravi Kota chuan, Nepal-ah hian an state mi leh saten an chhungten an ngaihven mek chanchin hriattur a la awm lo niin a sawi.

State sorkar chuan New Delhi-a Assam House-ah tuilian kaihhnawih emergency help desk a siam a, he hmalakna hmang hian ṭanpuina leh chhawmdawl hna thawh a ni dawn a ni. Hetih mek lai hian Nepal-a tuilian vanga thi hi nimin Zirtawpni thleng khan mi 469 an tling tawh a, ruang eng emaw zat hmuh chhuah a ni tawh bawk. Hmun hrang hrang aṭangin hliam tuar 1,545 leh tuiliana tangte chhan chhuah an ni tawh a, mi 84 chu Kathmandu-a damdawi-inah enkawl mek an ni. Chhan chhuah leh puihbawm hna pawh a ni thumna atan chhunzawm zel a ni a, security 7,451 tirh chhuah tawh niin, chung zingah chuan Nepal Army aṭangin 2,391 an tel tih Nepal police-te an sawi.