Meghalaya : Nepal-a tuilian thlen hnuah state mi leh sate tan helpline hawng

Meghalaya State Disaster Management Authority (SDMA) chuan August 26-a tuilian leh lei tawlh nasa tak a thlen hnua Nepal-a state mi leh sa awm mek an awmna chin hriat loh emaw, biak theih loh emaw an nih chungchanga buaipui turin helpline a hawng. He chhiatna hi Nepal-a Rasuwa district, Nepal-Tibet ramri bula thleng a ni a, khaw hrang hranga kawng leh infrastructure dangte nasa takin a tichhia a ni. Mi eng emaw zat an awmna chin hriat a nih loh bakah, biak theih an ni lo tih SDMA chuan a tarlang.

Meghalaya sorkar chuan chhungkaw member, chhung hnaivai, ṭhiante, travel agency, tour operator-te leh mipuite chu state mi leh sate harsatna tawk an awm tih an hria a nih chuan thu kimchang nena puangzar turin an hriattir a, biak theih loha awm mekte chanchin kimchang pe turin a ngen a ni. SDMA chuan state khua leh tui hming leh kum, contact number, Meghalaya-a an chenna hmun, Nepal-a an awmna chin nia hriat hnuhnung ber leh an inbiakna hnuhnung ber hrilhhre turin an ngen bawk. Thuhriat neite chu an hming leh biak theihna tur kimchang pe turin an ngen bawk.

Heng information-te hi lakkhawm a nih hnuah thuneitute hnenah theh luh a ni dawn a, finfiah leh puih hna thawh a ni dawn tih SDMA chuan a tarlang. Mipui hriattirna hi August 27 khan Shillong-a Meghalaya State Disaster Management Authority chuan a tichhuak a ni.