Tripura : TTAADC chhungkua 80% in tui connection nei tawh

Tripura Tribal Areas Autonomous District Council (TTAADC) hnuaia chhungkaw 80% vel chuan tui connection an nei tawh tih chief minister Manik Saha chuan nimin August 27, Ningani khan state Assembly-ah a sawi. Tripura Legislative Assembly Monsoon Session neih ṭan nia thu a sawiah, Saha chuan sorkarin khaw tinah tui supply huang zauh tumin hma a lak chhunzawm zel thu a sawi.

He thu hi Tipra Motha Party MLA Ranjit Debbarma sawi chhuah niin, TTAADC huam chhung hmun eng emaw zatah tui tlakchhamna a thleng tih sawiin, he harsatna sutkianna atan sorkar chu a rang thei ang bera hma la turin a ngen. Debbarma chuan West Tripura district-a Mungiakami hills huam chhungah kawng dan a nih thu sawiin, he thil vang hian minister Kishor Barman a tang niin a sawi. Tui supply kaihhnawiha lungawi lohnate chu a hma thei ang bera chingfel turin a ngen bawk a ni.

Hemi chungchangah hian CM Saha, Drinking Water and Sanitation (DWS) department changtu ni bawk chuan, harsatna awmte sutkian a nih theihna turin theihtawp an chhuah zel dawn tih a sawi. Chief Minister chuan tlangram hmun eng emaw zatah conventional deep tubewell dah theih a nih loh thu leh, a hmunin a zir loh avangin leihnuai aṭanga tui lakna tur mumal a awm loh thu a sawi. Sorkar chuan helai hmunte chengten tui supply an neih thuai theihna turin kawng dang a dap mek a ni, a ti.