Meghalaya : KSU rally-a buaina chhuak chhuizui turin SIT din

Meghalaya sorkar chuan August 19-a Shillong-a Khasi Students’ Union (KSU)-in rally an buatsaiha buaina chhuaka mawhphurtute hriatchhuah leh thubuai siamsak turin special investigation team (SIT) a din tih chief minister Conrad K Sangma chuan August 24 khan Assembly-ah a sawi. SIT hi Inspector General of Police (Law and Order) chuan a kaihruai dawn a, buaina chhuak chhuizuina leh Assam lirthei beitute zawn chhuah hna an thawk ang.

Assembly favang ṭhutkhawm hmasa berah CM Sangma chuan thuchhuah siamin, team-te chu he buaina inhnamhnawihte zawng chhuak tur leh hremna pe tura tih an nih thu a sawi. KSU bike rally hi zirlai pawl hian an thil phut tihlawhtlin phutna atana an huaihawt a ni a, rally hi Shillong hmun hrang hrangah neih a ni. East Khasi Hills police superintendent Vivek Syiem chuan lirthei 31 tihchhiat a nih thu leh, mi 18-in hliam an tuar a, lirthei pahnih hal a ni a, lirthei tihchhiat zinga pariat chu Assam lirthei a nih thu a sawi.

CM Sangma chuan rally buatsaihna atan East Khasi Hills Deputy Commissioner-in phalna a pek thu leh, KSU-in ralmuang taka buatsaih an tiam thu a sawi. Mahse rally neih lai hian misual tu tih hriat lohten buaina an chawk chhuak a ni, a ti. He buainaa hliamte chu Shillong Civil Hospital panpui an ni tih a sawi bawk. August 19-a buaina chhuakah hian FIR 15 theh luh a ni tawh a, pawikhawihtu mi panga hriat chhuah an ni tawh bawk a ni.