Assam : CM-in Union Minister hmu

Assam chief minister Himanta Biswa Sarma chuan Thawhṭanni, August 24 khan road transport and highways union minister Nitin Gadkari chu New Delhi-ah hmuin, tun hnaia tuilianin National Highway-a kawng a tihchhiatte siamṭhat dan tur leh, tuilian thleng ṭhin laka kawng infrastructure thuam chak dan tur chungchang an sawi dun. Meeting-ah hian Sarma chuan tuilianin a nghawng highway-te chu siamṭhat thuai a ṭul thu a sawi.

Chief Minister chuan Assam-a highway siam dan tura ruahmanna chuan tuilian thlen tamna hmun a dawl zawh a ngai tih sawiin, culvert leh lei dawh tur design leh a awmna hmun turah ruahmanna felfai siam a pawimawh thu a sawi. Hetiang ruahmanna ṭha zawk siam a nih chuan drainage system a thuam chak dawn a, highway inkalpawhna pawimawhah tuilianin nghawng a neih a tiziaawm thei dawn tih a sawi bawk. Jorabat-a tuilian thleng chungchang pawh sawilangin, tuilian vanga harsatna thleng ṭhin sutkianna tur ngelnghet tak ruahman a ṭul tih a sawi bawk.

CM Sarma leh Union Minister chuan Assam-a kawng infrastructure project lian thamte pawh thlirletna an nei a, chung zingah chuan Kaziranga Elevated Corridor leh Guwahati Ring Road pawh an tel. Sarma hian heng project-te hi chak zawka thawh a nih theihna tur leh, state puma highway pawimawhte tihchangtlun a pawimawh thu a sawi. Meeting zawhah Sarma chuan Gadkari-a'n Assam kawng infrastructure leh highway-a inkalpawhna tihchangtlunna turin an pui chhunzawm zel dawn tih a sawi a ni.