Arunachal : Child Trafficking network nia rinhlelhah naupang 19 chhan chhuak

Arunachal Pradesh-a Namsai police-te chuan, inter-district child trafficking and exploitation network nia rinhlelhah naupang 19 an chhan chhuak a, he thila inhnamhnawih hmeichhe pathum an man bawk. Namsai-a Child Welfare Committee (CWC)-in complaint an theh luh hnuah Namsai Police Station-ah August 17 khan thubuai ziah luh a ni.

He thubuai kaihhnawihah hian SP Namsai Sangey Thinley chuan Special Investigation Team (SIT) dinin, a kaihhruaina leh DySP Martan Ratan puihnain chhuizuina neih a ni. DySP Kengo Dirchi, SDPO Namsai chu investigating officer a ni a, team-ah hian inspector T. Gadi, OC Namsai PS, SI R. Kahik leh mi dangte an tel bawk. Naupang hralh rukna network-a an mi mante hi Gumnya Kochung, Marta Ete leh Neha Gerory-te an ni.

Police-te chuan an mi mante hian chhungkaw khawsak harsa leh hnuaihnung zawkte an bitum tih tarlangin, zirna ṭha an dawn theihna tura bum chhuakin Mechuka, Aalo, Pasighat, Naharlagun, Itanagar leh Longding-ahhte hruai an ni tih an sawi. Chhuizuina an neihah, naupang pakhat hi Rs 10,000 aṭanga Rs 50,000 inkarin an hralh tih hriat chhuah a ni. Nu leh pa emaw naupang enkawltu ṭhenkhatte emaw chuan pawisa hi an dawng nia an rinhlelh thu police-te chuan an sawi. Naupang an chhan chhuah zinga ṭhenkhat chu hotel leh mi inchhungkhura hnathawka chhawr an ni bawk.

Chhuizuina neitute chuan naupang chhan chhuah zinga a tam zawk chu kum riat hnuailam an nih thu leh, kum thum mi chu a naupangber an nih thu an sawi a, an chhungte hming sawi thei lo an awm tih an sawi. Naupangte chu medical exam tura hruai an nih hnuah CWC-ah hlan an ni.