Tripura : CM-in tuilian thlenna hmun leh relief camp tlawh

Tripura chief minister Manik Saha chuan, district ṭhenkhata tuilian thlenna hmun leh relief camp-te tlawhin, sorkarin tuilian vanga harsatna thleng mek chinfelna turin hma a la dawn tih a sawi. He thu hi tuilian thlenna hmun leh, Bardowali-a Vivekananda School-a relief camp-a awm mekte a tlawh hnuah sawiin, tuilian tuarte nen inbiakna an nei bawk.

Chief Minister chuan West district-a Khowai-a leh Barmura Hills hmun tam takah ruahsur nasa avangin tuilian a thleng tih a sawi. Kum 2024 August thla khan hetianga tuilian nasa hi a lo thleng tawh tih a sawi bawk. Tuilian vanga harsatna leh chhiatna a thlente tihziaawm tumin mitinin theihtawp an chhuah thu leh, District Magistrate-te leh Secretary thlengin hma an la nasa hle tih a sawi bawk. Amarpur-a programme buatsaihah hun a hman laiin official-ten phone hmanga an biak thu lrh, Haora lui chuan hlauhawm chhinchhiahna a pel tawh tih hriattir a nih thu a sawi a, mahse tunah chuan tuilian pawhin ziaawm lam a pan leh tawh a ni, a ti.

CM Saha chuan relief camp-te pawh din a ni a, mitin tan ei leh in buatsaih a nih thu a sawi. Disaster team-te pawhin lawng hmangin chhan chhuah hna an thawk a ni, a ti. Report thar bera a lan danin, relief camp 17-ah tuilian tuar chhungkua 413 an awm mek a, an vaiin mi 1305 an ni. Tuilian vanga harsatna thleng ṭhin tihtawp a nih theihna tur a ngaihtuah mek thu leh, sorkar chuan theihtawp a chhuah zel dawn tih CM chuan a sawi bawk.