Manipur : Senapati district-ah buaina chhuak

Manipur-a Senapati district-a Taphou huam chhungah nimin Thawhṭanni, August 24 khan Naga leh Kuki community-te inkarah buaina chhuak thar lehin, he buainaah hian CRPF sipai pakhatin hliam a tuar a, chenna in pahnih hal a ni bawk. Official-ten thuchhuah an siamah, 36th Battalion, CRPF sub-inspector (General Duty) Pradeep Singh chu zing dar 10 vel khan ralthuam keng pawlte nena silaia an inkahnaah a ke veilam kah a ni tih an tarlang. A hliam enkawl tur hian Senapati Hospital-ah hruai a ni.

Silaia inkahna hi misual tu tih hriat lohten chenna in pahnih an hal hnua thleng a ni. Police-te chuan chenna in pakhat chu Kuki mi ta a nih thu leh, pakhat zawk chu Poumai Naga mi ta a nih thu an sawi. Kangmei chhuah chhan leh hemi hnua silaia inkah a nih chhan hi thuchiang a la awm lo. He thila mawhphurtute hi tute nge an nih tih official-a finfiahna a la awm lo bawk. Taphou huam chhungah hian security dah belh nghal a ni a, tualchhung mi eng emaw zat chuan he buaina chhuak vang hian helai huam chhung hi an chhuahsan nia sawi a ni bawk.

Tualchhung mite chuan Kuki helpawlin Liangmai Naga khua an bei niin an sawi a, mahse finfiahna a la awm lo thung. Hetih mek lai hian mipui lungawi lo chuan Senapati headquarters bul, Imphal leh Dimapur inkalpawhna National Highway-2 an dang nia sawi a ni. Helai hmunah hian motor ke halna hnuhma leh bawlhlawh hmuh a ni. Taphou Kuki khaw thuneitute chuan Kuki-te chenna in hal a ni chu an dem thu leh, he thil thleng hi pawm zam theih a nih loh thu an sawi. District administration leh police-te chu mawhphurtute man chhuak a, dan anga hma la turin an ngen a ni.